Boʻri va quyon

Yolgʻiz yoʻlda boʻriga

Duch kelib qoldi quyon.

Xayrli tun! – dedi-yu,

Qochmoqchi boʻldi shu on.

– Quyosh endi chiqdi-ku,

“Xayrli kech” nimasi?

Jinni boʻldingmi? – dedi

Qotib boʻri ensasi.

Quyon der: – Uzr, janob,

Qoldim soʻzdan adashib.

Sizni koʻrsam, koʻz oʻngim

Ketar qorongʻilashib.

Onam allasida yashaysan, Vatan

Koʻhna beshigimni quchaman, joʻshib,

Onam allasida yashaysan, Vatan.

Mehrini tutadi kuyiga qoʻshib,

Hofiz yallasida yashaysan, Vatan.

Erk uchun qalamin ayladi qalqon

Abdulla Qodiriy, Fitrat-u Choʻlpon.

Hindda shoh boʻlsa-da sogʻindi har on,

Bobur nolasida yashaysan, Vatan!

Koʻzlarga toʻtiyo zarra tuprogʻing,

Amir Temur tugʻi – nurli bayrogʻing,

Oltinga alishmas shuvoq, yantogʻing,

Choʻpon chaylasida yashaysan, Vatan!

Kindik qonim tomgan ostonam oʻzing,

Boshimda hamisha parvonam oʻzing,

Koʻnglim qalʼasida yashaysan, Vatan,

Onam allasida yashaysan, Vatan!

Komila RAJABOVA,

Navoiy shahar

11-sonli ixtisoslashtirilgan maktab

oʻqituvchisi, Xalq taʼlimi aʼlochisi