Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Oymomojon, qoʻy uxlay…

Ukam shirin uyquda,

Singlim orom olmoqda.

Akam Said “xur-xur”lab,

Mayin xurrak otmoqda.

Mening ko‘zimda esa,

Eh, uyqudan darak yo‘q.

Derazadan oymomo,

Imlar meni ko‘zi lo‘q.

Gaplashaman xayolan,

Kulcha oymomo bilan,

Mars tomon yo‘l olaman

Raketada daf’atan.

Qani Zuhro yulduzin,

Ipga bog‘lab olsam-a.

Maktabga ham bormasdan,

Olim bo‘lib qolsam-a...

Hamma ta’zimda turib,

–  Salom, ustoz! – deyishsa.

“Masala”ni yashirgan

Gulnor-u Xol kuyishsa...

Domlamiz Ma’mur Sulton,

–  Xizmat bormi? – deb tursa.

Hu, a’lochi Mirzoqul

Soyam bo‘lib yugursa.

...Oymomojon ketaqol,

Tong ham otib bormoqda,

Xomaki xayollarim

Xo‘p hakalak otmoqda.

Hakka

Hakka, hakka, dam olishga,

Yo‘qmi, biror fursating?

Bilolmadik shu kunlarda,

Oshib ketdi g‘ayrating?

–  Chog‘roqqina yong‘oqzorni

Ijaraga olganman.

Shundan beri yugur-yugur,

Tashvishli bo‘p qolganman.

 

Hashar emas osharga...

–  Allo, allo, Mirvali!

–  Allo, tinchlikmi, Malik?

–  Maktabimiz bog‘ida,

E’lon bo‘lgan shanbalik.

Belkurak, chelak bilan

Hasharchibop bo‘lib kel.

Iloj bo‘lsa, hissam deb,

Uch-to‘rt ko‘chat olib kel.

–  Nima, nima, takrorla...

–  Shanbalikka, hoy ovsar.

–  Tushunmayapman, allo,

Nima deding, bir qaytar.

–  Kar bo‘ldingmi, hov anqov,

Shanbalikka! Shanba – ish!

–  Allo, puf... puf, bu telefon...

Ovozing buncha xish-xish?

–  Allo, allo, muzqaymoq,

Yaxshisi “Bahor”ga o‘t.

–  Ha, ha, endi tushundim,

Ketyapman, o‘rtoqjon, kut!

 

Egamnazar Sohibnazarov

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.