O‘zbekiston bayrog‘i

Ko‘zlarimning qarog‘i.

Yuz ko‘rsatding jahonga,

Toza dillar charog‘on!

Orzularning cho‘g‘i bor,

Temur bobom ruhi bor.

Ellar ichra teng elning

Bugun senday tug‘i bor!

Ko‘kni bezab turgan yoy –

Hech o‘xshashi yo‘q chiroy.

Hikmatlarga buncha boy,

Senda porlab turar oy!

O‘n ikkita yulduzim,

Charaqlagan kunduzim.

Bu – g‘urur-u dil so‘zim,

Bu – mening yorug‘ yuzim!

Mustaqillik nurisan,

Muhabbatim qo‘risan.

Odamiylik bahsining

Hamishalik zo‘risan!

Mening borim-yo‘g‘imsan,

Yurakdagi cho‘g‘imsan.

Dunyo bo‘ylab hilpira,

Sen mardona tug‘imsan!

Yo‘ldosh Sulaymon