Tong daftari

Tursam shirin uyqudan

Tong daftarin varaqlar.

Sarlavhasi “Tinchlik” deb,

Quyosh xursand charaqlar.

Shabbodaning so‘ziga

Gul tebranib raqs etar.

Shoxda chumchuq chirqillab,

Bulbul bilan bahs etar.

Ariqchada zilol suv,

Qo‘shiq aytib shildirar.

Qo‘ldan tushib koptogim

Bir oz sakrab g‘ildirar.

Ayri cho‘pni ko‘tarsam,

Uzum boshi ilinar.

Anjir rangi sarg‘ayib

Pishganligi bilinar.

Dasturxonda noz-ne’mat,

Piyolada shirin choy.

Shirmoy kulcha yonida

Qaymoq bor-ov hoynahoy...

Lim-lim quvonch yurakda,

Ochilar dil darchasi.

Bu – mustaqil Vatanda

Bir go‘zal tong parchasi.

Yetolmadim dalaga

Onam issiq non berib,

Dedi: – Tez elt, otang-ga!

Yo‘lda futbol qizidi,

Kech bo‘libdi, attang-a...

Otam xomush o‘tirar,

Onam yozar dasturxon.

Bir so‘z demay yer chizdim,

Qo‘ltig‘imda sovuq non.

Onam hayron, otam der:

– Urishmoqdan yo‘q foyda,

Ishda unum bo‘lmaydi,

Loqaydlar bor joyda.

Bir dona oy, durdona oy

Yerdan yiroq – osmonjon,

Oltin chiroq osgan on.

Qo‘l uzatsam yetmadi,

Xafa bo‘lib ketmadi.

Oymomojon, oymomo,

Oppoq nurga boy momo.

Handalakdek kuldi u,

Dumalamay yurdi u.

Tushib ketmas, sehri bor,

Odamlarga mehri bor.

Oymomojon, oymomo,

Oppoq nurga boy momo.

Oyni hech kim olmasin,

Olam oysiz qolmasin.

Bir dona oy yashasin,

Durdona oy yashasin.

Oymomojon, oymomo,

Oppoq nurga boy momo.

Kim qayerda uxlaydi?

Quyoshga soz tog‘ orti,

Kulcha bo‘lib g‘ildirar.

Suvlar qo‘nim topolmay,

Ariqchada pildirar.

Qo‘zichoq shod suykalar

Ona qo‘yga soyada.

Burgutlar-chi, xotirjam

Tin olishar qoyada.

Bolalar-ey, bolalar,

Qorni to‘ysa, erinib

Joy tanlamas, qo‘yar bosh

Ish qilgandek kerilib.

Vali Ahmadjon