O‘zbekiston xalq shoiri Anvar Obidjonning 70 yillik tavallud kuniga

Anvar aka! O‘qidim –

Jurnalda bir hazil she’r.

Unda sizni muallif

“O‘zbek Anderseni” der.

Kitobingiz varaqlab,

O‘ylab qoldim o‘zimcha.

O‘sha so‘zga, albatta,

Zarur ekan qo‘shimcha.

Qahramonlaringiz ko‘p –

Mard, jasur, jaydarisi.

Sizni atamoq mumkin

“O‘zbekning Rodarisi”.

Qotirib qo‘yasiz-da

Fantastik qissa, she’rni.

“Avtobola”dan keyin

Siz “O‘zbekning Jyul Verni”.

Qachonki o‘qilganda

“O‘g‘irlangan pahlavon”,

“O‘zbek Pushkini” deymiz

Esga tushgach Knyaz Gvidon.

Obrazlaringiz quvnoq,

Hayratga solar meni.

O‘qigandan so‘ng deyman,

Siz “O‘zbek Mark Tveni”.

Asar tagma’nosida

Mukammallik shiftisiz.

Bu borada, albatta,

“O‘zbekning Svifti”siz.

Qofiyalaringiz zo‘r,

Aslo emas xashaki.

Bu sohada o‘zingiz

“O‘zbeklarning Marshaki”.

Qahramonlar taqdirin

Ko‘p qiynoqqa solasiz.

“O‘zbekning Defosi”ga

Shunda o‘xshab qolasiz.

Jonivorlar tilin jo‘r

Qilib inson dardiga,

Aylanasiz “O‘zbekning

Kipling Redyardi”ga.

Pinokkio singari

Qissangizda Meshpolvon –

Adolat uchun kurash

Boshlaganda beomon,

Asaringiz o‘qiboq

Aytamiz shu zahoti:

“Anvar aka o‘zbekdan

Chiqqan Karl Kollodi”.

Xullas, shunday hazil she’r

Sizga bugun yo‘lladik.

Shu bahona, siz yozgan

Asarlarga bo‘yladik.

Buyuklarga buyukni

Taqqosladik biz rosa.

Va chiqardik, nihoyat,

Shunday ajib xulosa:

Siz badiiyat qiroli

Hamda uning sarvari.

Siz emas, ular bo‘lsin

O‘z xalqining Anvari.

Kavsar Turdiyeva,

Bolalar shoiri