– Turgin, – onam uyg‘otdi,

– Buncha bo‘lma dangasa.

Doim uxlab qolasan

Biz seni uyg‘otmasak.

Badantarbiya mashqin

Bajargin zavqqa to‘lib,

Quv g‘aflat aravasin

Kuchli, g‘ayratli bo‘lib.

Irodali bo‘l, o‘g‘lim,

O‘z yo‘ling top gurillab.

O‘zim ko‘maklashaman

Soat qulog‘in burab.

Turmaysanmi? Tur tezroq,

Nonushta qil qand-qurs-la.

Qara, alqab yaproqlar

Chalishmoqda qarsaklar.

Quloq tutdingmi yasha,

Yur bu damni e’zozlab.

Borgin ilm koniga,

Seni kutar ustozlar.

 Moʻmin AVAZ