SAVOL

Osmondagi sirli yulduzlar

Aytarmikan kelajagimni?

Gul Vatanni yana ham gulgun

Bog‘ misoli etajagimni.

Oy, Zuhroga men etib parvoz,

Gulg‘unchalar taqib qaytaman.

Lablarimga qo‘nib tabassum,

“Tinchlik” so‘zin jo‘shib aytaman.

Osmondagi sirli yulduzlar

Aytarmikan kelajagimni?...

KAMALAK

Injulanib ko‘kda kamalak,

Sehrlaydi jajji dilimni.

Quvonchidan hayqirar falak,

Sevintirib tanti dilimni.

Yuragimga yellar kiradi,

Sho‘x hislarim go‘yo bir vujud.

Eh tengdoshim, bilsang, qalbim va

Kamalakda uyg‘unlik mavjud.

Undan oltin yoshlik ufurar,

Unda yashar olov yuragim.

Qo‘lim rulni tinchlikka burar,

Dil bog‘layver, sho‘x kamalagim!

BAXTIYORMAN

Vatan, baxtli qizingman,

Qalbim – quyoshga makon.

Yuzda mehrim tovlanar

Seni eslagan zamon.

Baxtiyorman bag‘ringda

Ko‘nglim doim guldayin.

Shuur olib oftobdan

Ulg‘ayaman kun sayin.

OQIBAT

– Oymomo, hoy, oymomo,

Nega bu kech yolg‘izsan?

Atrofingda yo‘q darak

Inju sochar yulduzdan.

– Eng yorug‘man, deb rosa

Maqtangandim, baayni.

Xafa bo‘lib yulduzlar

Ketib qoldi, og‘ayni!...

AFSUS

Sobir tursa ertalab,

Qor yog‘ibdi xo‘p elab.

Ko‘rib birdan zo‘r “fokus”,

Tamshanib dedi: “Afsus...

Qarang, tomda sumalak,

Qish bobomning sovg‘asi.

Konfetlari yaxshi-ku,

Yomon tomoq g‘avg‘osi”.

Gulandom TOG‘AYEVA