Vatan muqaddassan

Vatan, sen aslida mening yuragim,

Qalbim tubidagi shirin tilagim,

Koʻzimni ochiboq koʻrgan-bilganim,

Vatan muqaddassan, sen muqaddassan.

Doimo eʼzozda qutlugʻ kitobing,

U bilan yorugʻdir koʻkda oftobing,

Oʻzbekning dilida misli mehrobim,

Vatan muqaddassan, sen muqaddassan.

Chiroying ochilar kundan kun yurtim,

Mana 30 yilki, nonimiz butun,

Istiqlol bizlarga baxt tutar tun-kun,

Vatan muqaddassan, sen muqaddassan.

Yashayman baxtiyor dilda shukrona,

Kelajakka ishonch, tilda shukrona,

Baxti barkamol shu elda shukrona,

Vatan muqaddassan, sen muqaddassan.

Kitobdan oʻrgandi

Bolamga kitob berdim,

Oʻqishga qoʻydi mehr.

Satrlar orasidan

Topdi u ajib sehr.

Nainki, faqat sehr,

Ziyo topdi porlagan.

Kuch va zakovat topdi

Maqsad sari chorlagan.

Maqsadga erishmoq-chun

Koʻproq oʻqidi bolam,

Mening-chi zavqim toshib,

Koʻnglim boʻldi xotirjam.

Millat allomalarin

Tanib oldi birma-bir,

Oʻqigan sari unda

Kamol topmishdir sabr.

Kitob oʻqib xayolan

Moziy bilan uchrashdi,

Ajdodlarini tanib

Dil-dilidan soʻzlashdi.

Kitobdan oʻrgandi u

Shijoat-matonatni,

Muqaddas Vataniga

Mehr va sadoqatni.

Nabiralar

Oʻgʻil, qiz nabiralar

Hayotimiz bezagi,

Ular kamolin koʻrish

Bobo, buvi tilagi.

Ilmga qoʻyib mehr,

Kitobdan topib sehr,

Sogʻlom oʻsib, ulgʻayib,

Boʻlsin yurtin tirgagi.

Vatan mehri dillarga

Qoʻrgʻoshindek quyilsin.

Madhiyani tinglasa,

Alla misol tuyulsin.

Oshirib til boyligin,

Bolalik shoʻx soyligin,

Lahzalar qadrin bilib

Erkalansin, sevilsin.

Aʼlo oʻqimoq uchun

Imkoniyat bisyordir.

Har qadam yoʻlingizda

Yurtboshi mehri yordir.

Odat qiling salomni,

Qadriyatlar, kalomni.

Olqishlar olib yashang

Shunda el baxtiyordir.

Muqaddas Abdusamatova