Qizim:

– Dada, qarang bog‘ tomon,

Shamolda, sinib yomon,

Qo‘shnimizning xurmosi,

To‘kilibdi biz tomon.

Terib olib kelaymi,

Yuvib olib kelaymi,

Ezilgani, xomlarin,

Tovug‘imga beraymi?

– Jon qizim, jonim qizim,

Ajoyib, dono qizim,

Qo‘shnilarning xurmosin,

Mayli ter, a’lo qizim.

Bitta iltimos, qizim.

Topgin chelak bo‘shini,

Xurmolarin qaytarib,

Shod qilamiz qo‘shnini...

Senga shunday nasihat,

Qulog‘ingdan tushmasin,

O‘zgalar narsasiga,

Aslo ko‘ngling tushmasin.

Bog‘imizga shamolda,

To‘kilibdi ko‘p xurmo.

Egasiga qaytargin,

Tushgan bo‘lsa ham tillo.

Mansurjon XO‘JAYEV