– Dunyo nima, dadajon?

– Dunyo so‘qmoqdir, bolam,

Dunyo chaqmoqdir, bolam,

Dunyo asli Muallim,

O‘zni uqmoqdir, bolam...

– Ilm nima, dadajon?

– Ilm ziyodir, bolam,

Ilm tillodir, bolam,

Ustozlardan ol ta’lim,

Ilm dunyodir, bolam...

– Hunar nima, dadajon?

– Hunar halol non, bolam,

Va xotirjam jon, bolam,

Hunarli xor bo‘lmagay,

Va minglab imkon, bolam...

– Boylik nima, dadajon?

– Boylik iymondir, bolam,

Toza vijdondir bolam,

Sen-u, mening borligim,

Gul xonadondir, bolam...

– Tinchlik nima, dadajon?

– Tinchlik tabassum, bolam,

Shodlik jamuljam, bolam,

Hur hilpirar bayrog‘ing,

O‘yna, xotirjam, bolam...

– Vatan nima, dadajon?

– Vatan onangdir, bolam,

Vatan – oila, mahallang,

Bu olamga sig‘maydi

Vatansiz odam, bolam...

– Rahmat sizga, dadajon...

– Savol bormi, qaqajon?

Mansurjon XO‘JAYEV