Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Quyosh yerga parvona

Ovsey Driz,

yahudiy shoiri

 

Sirli hodisa

Qo‘shiq kuylar bir bola,

Qo‘sh darvoza yonida.

Ajabtovur kuy sehri –

Jo‘sh urardi qonida.

 

Qo‘lida zarang taxta,

Temir eshik jaranglar.

Ajabtovur sadodan

O‘tgan-ketgan alanglar.

 

Skripkachi usta ham

Ta’sirlanib yo‘taldi...

Derazadan mo‘ralab,

Ko‘zoynagin ko‘tardi.

 

– Xuddi shunday taxtani

Men axtarib yashardim.

Agarda sovg‘a qilsang,

Bir skripka yasardim.

 

Ajabo, yana bitta

Yangi soz ham yaraldi.

Usta unga yashirgan

Sir atrofga taraldi.

 

Torlar-chi nola qilar,

Ohista qaqshab-qaqshab.

Qo‘sh darvoza oldida,

Turgan bolaga o‘xshab.

 

 

Tarozilar

Tarozining turi ko‘p,

Ko‘rib hayron qolasan.

Bittasida baliqning

Vaznin tortib olasan.

 

– Ing‘a-ing‘a, – der buvak,

Ana jajji qo‘lchalar.

Bunda yangi mehmonning,

Og‘irligi o‘lchanar.

 

Biri tortar sabzavot,

Sotuvchining korida.

Aptekaning chenovi

Mo‘ljallangan doriga.

 

Mening esa tarozim

Barchasidan soz, ortiq.

Har bir gapni o‘ylanib,

Aytaman o‘lchab, tortib...

 

 

Sado

Daraxt yel-sabo bilan,

Shamollar sado bilan.

Tandirdan uzilgan non

G‘aroyib qisirlaydi.

Uni yegan bolajon

Ushog‘in tushirmaydi.

Gulning isi mast qilar,

Yomg‘ir dilni g‘ash qilar.

Bo‘ron noxush bo‘kirar,

Qashqir ulib-o‘kirar.

Soat azal beshafqat

Bong urib turar faqat...

 

 

Kim nimaga bog‘langan

It zanjirga bog‘langan,

Tulpor esa arqonga.

Chelak quduq boshida,

Mol – pichanga har holda.

 

Oy osmonga osilgan,

Qo‘riqchidir yulduzlar.

Quyosh yerga parvona,

Nurafshondir kunduzlar.

 

Odamlar-chi azaldan,

Yaxshilikka chog‘langan.

Shuning uchun hamisha

Bir-biriga bog‘langan.

 

Tursunboy ADASHBOYEV tarjimalari

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.