Qalbimda ochildi goʻyo bir tilsim,

Sirlaring mahzani ado boʻlmasdek.

Oppoq orzularga toʻldi bu koʻksim

Ruhimni osmonga olib uchgandek.

Bunchalar fusunkor boʻlmasang, bahor,

Men senga oʻxshagim keladi takror!

Meni ham sen kabi kutisharmikin,

Yoʻllarimga boʻlib zor-zor, intizor.

Qani goʻzal boʻlsa sheʼrlarim sendek,

Ildizlari teran, sehrli gulzor.

Bunchalar fusunkor boʻlmasang, bahor,

Men senga oʻxshagim keladi takror!

Xushboʻy gullaringga bagʻrimni tutdim,

O, mavjlanib ketdi hislar ziloli.

Dilbar kunlar aro oʻzni unutdim,

Allalading meni goʻdak misoli.

Bunchalar fusunkor boʻlmasang, bahor,

Men senga oʻxshagim keladi takror!

Nilufar Jabborova