Anor

Namanganda bir bogʻga kirsam,

Anorlari handalakcha bor.

Yorib koʻrsam, yoqut donlari

Xuddi qoʻlda terganday qator.

Qani, anor donalariday

Terolsaydim soʻzlar gavharin.

Bogʻbon kabi xalqimga men ham

Tutar edim sheʼriy daftarim.

Shamol menga yoqadi

Uchirsa ham doʻppini,

Shamol menga yoqadi.

Koyimanglar koʻp uni,

Shamol jonning rohati.

Xush koʻraman xoʻp uni,

Shamol meni “boqadi”:

Shox silkitib har kuni

Toʻp-toʻp yongʻoq qoqadi!

Shirin tush

Xursand uygʻonaman,

Koʻrsam shirin tush.

Yaxshi tush koʻrganda,

Koʻnglim boʻlar xush.

Sinadim: oʻngimda

Shod yurgan kunim,

Shirin tushlar koʻrib,

Oʻtadi tunim.

Palagi toza

Nega baʼzi kishini

“Palagi toza”, derlar.

Maqtab xulqi, ishini,

“Oling andoza”, derlar.

Qovun palagi toza,

Demak, tushmagan kasal.

Hosili ham moʻl rosa,

Mazasi ham naq asal.

Bogʻimday

Yomgʻir yogʻar shovullab,

Yuvar changni-gʻuborni.

Choʻmiltirib, bogʻimning

Husnin ochib yubordi.

Soʻlimlashdi barglari,

Mevalari yoqimtoy.

Jannatsimon bogʻ bormi

Dunyoda hech bogʻimday?

Togʻ rayhoni

Bir doʻst rayhon tutqazib,

Oliy himmat koʻrsatdi.

Bu – oddiymas, shifobaxsh

Togʻ rayhonin koʻchati.

Bogʻ toʻriga oʻtqazay,

Dimogʻlarni chogʻlasin.

Doʻst himmatin eslatib,

Yuraklarni bogʻlasin.

“Rahmat” menga tekkani

Mirzaterak novdasidan

Koʻp qalamcha tayyorlab.

Yoʻl boʻyiga mehr bilan

Qadagandim qatorlab.

El koriga yarab qoldi,

Yaxshi boʻldi ekkanim.

Odamlar uy qurib oldi,

“Rahmat” menga tekkani.

Topqir quyoncha

Dalada chopib yurib,

Quyoncha topdi zoʻr pat.

Bargdan yasab varaqni,

Dehqonga yozdi bir xat.

“Salom, dehqon bobojon,

Dalaga kelmaysiz hech.

Sabzilar ham yetilgan,

Terib oling boʻlmay kech.

Tunov kuni polizda,

Koʻrgan edim Tulkini.

Oʻzi yegan sabziga,

Aybdor qildi Ukkini.

Koʻrsichqon ham kavlabdi

Oʻra yonidan uya.

Aytib qoʻyay dedim-da,

Farqi yoʻq mengaku-ya.

Ichim achir koʻp mehnat

Qilgandingiz bahorda.

Bir oʻzim qoʻriqchimi

Shuncha katta angorda?

Hosilingiz yoʻqolmay,

Jon bobojon, keling tez.

Xabar bering oldindan,

Bilib qoʻyay oʻshal kez”.

Qish zavqi

Qor yogʻar mayin-mayin,

Oʻynab tushar atayin.

Quvonch toʻladi qalbga,

Qorni koʻrganim sayin.

Rangi billurdayin oq,

Momiqdek mayin, yumshoq.

Shakli turli ajoyib,

Mana, oʻzing koʻrib boq.

Qoʻndi novda ustiga,

Salom, dedi doʻstiga.

Kurtakcha ham jilmayib,

Oʻralar oʻz poʻstiga.

Gashti oʻzga, bebaho,

Oh, qanday toza havo.

Biram yoqar badanga,

Sogʻlom tanga zoʻr davo.

Changʻi ham uchdik picha,

Qoʻl-oyoqlar tolguncha.

Mazza qilib oʻynaymiz,

Yana bahor kelguncha.

Sulton Jabbor