Sohibqiron boqadi xushhol

Adolatni qalbga muhrlab.

Qudratiga butun dunyo lol –

Obidalar qo‘yar sehrlab.

Shahd-shiddatli jahongir Temur

Jasorati tillarda doston.

Mag‘lubiyat bilmagan yovqur,

Pir jilovdor bo‘lgandir har on.

Maftun etdi dunyo nigohin

Obod yurtda yashnagan bog‘lar.

Taratibon segoh-dugohin,

Ipak yo‘lin shu zamin bog‘lar.

Buyuk davlat sohibi Amir,

Ma’rifatga bo‘ldi rahnamo.

Tuzuk tuzib sarkarda Temur,

Avlodlarga yo‘lladi noma.

Faxr etarmiz g‘urur-la mangu,

Sohibqiron avlodimiz biz.

Voris bo‘lmoq ulug‘ sharaf bu –

Tengsiz zamin farzandimiz biz.

Dunyo bo‘ylab oldga intilar

Munosib har qiz-o‘g‘lonlaring.

Yurt bayrog‘in yuksakda tutar

Bahodir, mard pahlavonlaring.

Dilafro‘z CHORIYEVA