Yana boshlanmoqda hayratomuz tun.

Uxlar zamin, uxlar butun koinot.

Lek uxlamay esar shabboda mayin,

Darbadar kezadi tarqoq xayolot.

Samoda miltirab turar yulduzlar,

Bizlarni kuzatar ular hoynahoy.

Aslo tinim bilmay kecha-kunduzlar,

Shildirab oqadi qishloqlarda soy.

Uzoq-uzoqlarda miltirar chiroq,

Chigirtka chirillar ahyon-ahyonda.

Goʻyo dardin kuylar yiroqdan yiroq,

Maysalar shivirlab qoʻyar har yonda.

Falakda termulib turgan toʻlin oy,

Jumlayi jahonga nurin sochadi.

Oy shuʼlasi tushgan barcha-barcha joy

Yal-yal yonib, bahri diling ochadi.

Quvonchbek Baratov,

Qashqadaryo viloyati Shahrisabz tumani 46-maktab 10-sinf