(turkum)

Kalla degani aql, fikr, o‘y ini,

Charxlab bersin deya har kim fikr-o‘yini,

Ona tilim bog‘idan men ham gul terdim:

Bolajonlarga bir dasta so‘z o‘yini...

***

BU QAYSI FASL?

Birpasda sochlarim ketdi oqarib,

Bobomdek qoldimmi men ham , o, qarib?

Yaxshiyam uy issiq, chopib kirdim-u

Birpasda yoshardim, boshdan oq arib.

***

ESKIRDI

Yap-yangi edi tuflim,

Tepib kiydim ataylab.

Loy-suvga, tuproq-changga

Botirmadim avaylab.

Tumshug‘i lang ochilib,

Choki ketdi, eskirdi.

Endi nima kiyaman,

Esiz tufli...es kirdi.

***

NIMA YOQADI O‘ZI?

– Sen yaxshisan! Aytgandim shunigina,

Ketdi qoldi, qilgancha shuni gina.

Qiz bolaga “yomonsan”, demayman-ku,

Sizga aytsam, g‘alati shu Nigina.

***

AYRILIQ

Kuchukchamiz yosh edi,

Bor-yo‘g‘i bir yosh edi.

O‘lib qoldi, jim bo‘ldik,

Ko‘zlar jiqqa yosh edi.

***

TUZLANISH

Ovqat qildi O‘g‘iloy,

Ovqatmisan zo‘r qipti.

Kecha tuzi past edi,

Bugun esa sho‘r qipti.

Dasturxon atrofida

Hamma unga yuzlandi.

Icholmadik, o‘ziyam

Ovqatidek “tuzlandi”.

***

KIMGA QANDAY?

Bahor yomg‘ir yoqqani

Maysaga eng yoqqani.

Chumoli der: – Bas, oftob

Chirog‘ingni yoq, qani...

***

QOSH QO‘YAMAN DEB

Nima qilsak yoqamiz,

Xazon yig‘ib yoqamiz.

Hovli toza bo‘ldi-yu,

Tutun ust-bosh, yoqamiz.

***

ORZU

Kallam bilimga, o, lim,

To‘lsa, bo‘lardim olim,

Dedi-yu, dars paytida

Uxlab o‘tirdi Olim.

***

YOMG‘IR YOQQANDA

Shiftdan sizib tomchilar,

Chak-chak etib tomchilar.

Xona hovuz bo‘p ketdi,

Qayerdasiz  “tomchi”lar?

Ne’mat DUSHAYEV