Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Ta’rifi doston elim

(Mustaqilligimizning 25 yilligiga)

 

Dunyo kezdim, ko‘p zamon,

Sendek chaman topmadim.

Jannatga qiyos ko‘rking,

Biror maskan topmadim.

Tuprog‘ing oltinga teng,

Obu hayot bulog‘ing.

Boqsam hu Tangri tog‘dan,

Kulib turar yanog‘ing.

Mudom mehribon elim,

O‘zbekiston, O‘zbegim.

 

Porloq quyosh taftiga

Tandirda noning pishgay.

Oyqizlar chiroyiga

Ko‘kdagi hilol tushgay.

Momo Havo zurriyodi,

Barchinoylar yurti bu.

Hayoli, latofatli

Shoiralar yurti bu.

Ta’rifi doston elim,

O‘zbekiston, O‘zbegim.

 

To‘rt qit’ami, to‘rt tomon,

Hilpiraydi bayrog‘ing.

Kelajakni yoritar,

Bugun yoqqan chirog‘ing.

Tumor bo‘lay bo‘yingga,

Yo‘lamasin biror kas.

Istiqlol shamolidan,

To‘yib olaylik nafas.

Ko‘ksi ham osmon elim,

O‘zbekiston, O‘zbegim.

 

Bobom qo‘li duoda:

– Shukr, – der bu kunlarga.

Yulduzlar charaqladi,

Qop-qorong‘i tunlarda.

Ozodlik – ulug‘ ne’mat,

Onam aytar, o‘g‘lonim.

Yorug‘ manzillar tomon

Yetaklaydi sarbonim.

Ertang nurafshon elim.

O‘zbekiston, O‘zbegim.

 

Yigirma besh yil mana,

Gullab borar Vatanim.

Barchani ezgulikka,

Yo‘llab borar Vatanim.

Ey, qalamim, to‘xtama,

Yozaver yurt shonini.

Olam uzra yoyaver,

Hur, muqaddas nomini.

Boqiy bolajon elim,

O‘zbekiston, O‘zbegim.

 

Soyib Mirzo

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.