Bolajonim, sho‘xliging,

Sog‘lomliging tinchlikdir.

Usti butun, to‘qliging,

Polvonliging tinchlikdir!

Dunyodagi yaxshilar

Urushga choh qazirlar.

Gullarga, daraxtlarga

Tinchlik so‘zin yozarlar.

Gul bo‘lib, daraxt bo‘lib

O‘sib boradi tinchlik.

Urush – halokat yo‘lin

To‘sib boradi tinchlik.

Tinchlik aka-ukaning

Ittifoqi demakdir.

Qo‘ni-qo‘shni bir-birin

Tashvishini yemakdir.

Buvijonni qaritmay,

Tinchlik yoshartiradi.

Orzularing paydar-pay

Amalga oshiradi.

Ota-ona, do‘st-yorga

Iltifotda bo‘lmoqdir.

O‘zbek, qozoq, hamma el

Ittifoqda bo‘lmoqdir.

Meniki, seniki deb,

Bo‘lsak butun dunyoni,

Bo‘linadi yerimiz,

Bo‘lib bo‘lmas havoni.

Axir, havo bo‘lmasa,

Ayting, qanday yashaymiz?

Bizlar do‘stmiz, oshnamiz,

Biz tinchlikda yashaymiz,

Biz tinchlikka tashnamiz!

Umida ABDUAZIMOVA