Uch ogʻayni botirlar

Yevropada yoturlar.

Oftob oʻgʻlin koʻtarib

Yurmagan bahodirlar.

Sattorquli sardori,

Sotvoldisi shunqori,

Sobiri beozori...

Oftob bilmas qaylarda

Uch oʻgʻilning mozori.

Ularni tilab-tilab

Olgan edi Oftobi,

Qirgʻin jangga kuzatib

Qolgan edi Oftobi,

Bir qoʻyniga uchta non

Solgan edi Oftobi.

O, uch oʻgʻil azobi,

O, uch oʻgʻil azobi!

Uch ogʻayni botirlar,

Bilmam qayda yoturlar.

Oftob oʻgʻlin koʻtarib

Yurmagan bahodirlar...

Uch ogʻayni akam bor:

Birin oti – Jasorat,

Birin oti – Shijoat,

Birin oti – Matonat...

Muhammad Yusuf