Ustozlik aslida ulug‘ martaba.

Iltifot kerakmas ustoz zotiga.

Ustozlik – erishsang buyuk daraja,

Ziyo urug‘in separ bor bisotiga.

Ustozdir beminnat nur sochgan quyosh,

Ustoz – tiniq samoning yulduzi, oyi.

Mashaqqat, zahmatga beruvchi bardosh,

U suyuk, u buyuk – qalblarda joyi.

Ustozlar – ildizi mustahkam chinor,

Kelajak me’mori, u so‘nmas bahor.

Ustoz do‘st, unga yot hasadlar, kinlar,

Har og‘riq ko‘ngilga bo‘lar taskinlar.

O‘ylabmi, o‘ylamay qilgan har ishing

Zahmatkash ustozga berguvchi baho.

Bil-ki tubanlig-u isnoddan qo‘ling

Tortishga undagan u buyuk daho.

Yomonlikdan uzoq, jonkash, jafokash,

Uning-la sozlanar har shogird tori.

Ortidan ergashar bo‘lib cho‘g‘, otash,

Dovrug‘in ko‘tarar toliblar bori.

Tafakkur kishisi, ulug‘, fidoyi,

U bo‘lsin najotkor, jonkuyar mayli,

Olim-u, san’atkor, hunarmand bari

O‘zligin anglagan ustoz tufayli.

Saida ORIPOVA,

Toshkent shahar Uchtepa tumani