Vaqt o‘ziga abadiy

Dvigatel o‘rnatgan.

To‘xtayman, u to‘xtamas

Qaysarlikka o‘rgatgan.

Dadam avtosin har kun

Zap qarovdan o‘tkazar.

Moy kamaysa – moy quyar,

Yuvar, gardin ketkazar.

Har kun xarj etar aql

Idrok, bilim, ko‘z nurin.

Shu zayl sog‘ motorning

Uzaytiradi umrin.

Vaqt uxlamas, men esa,

Uxlamasam bo‘lmaydi.

Ojiz va nochor inson

Har xil usul qo‘llaydi.

Vujud – akkumulyator,

Uxlab zaryadga qo‘ygum.

Tunda kuch to‘plab kunduz

O‘tkazgum tashvish, to‘yim.

Intilish zoye ketgan

Vaqt aybin ketar yuvib.

Bilim, mehnat-la vaqtning

Ortidan yurgim quvib.

Mo‘min Avaz