Vatan soʻzi naqadar buyuk!

Avval uni anglamoq kerak.

Tuprogʻini tilloday suyub,

Tasavvurni ranglamoq kerak.

U baxt axir, bedavo dardmas,

Otin aytib hayqirish shartmas,

Ortga nazar tashlabon birpas,

Tafakkurni jamlamoq kerak.

Ne bir zotlar qoʻlida qurol,

Shu yer uchun kurashdi halol.

Shahid jonlar haqqi bemalol –

Qarogʻlarni namlamoq kerak.

Ushalgaydir bir kuni orzu,

Shoyad urush – almisoq mavzu.

Boʻyni uzun toʻplarning ogʻzi –

Muzeylarda zanglamoq kerak.

Hozir qoʻlga qalamni oldim,

Sheʼrni boshlab, oʻylanib qoldim...

Vatan haqda soʻylashdan oldin –

Har bir soʻzni tanlamoq kerak.

Yashamoqdan nedir muddao?

Unutib ham qoʻyamiz goho.

Yozganingga eng xolis baho –

Xalq tilida yangramoq kerak!

Orif TOʻXTASH