Ey bolajon, bolajon,

Fikri-yu zehni chaqqon,

Yurtimizga boqsang gar,

Dilda toshar hayajon.

Har sohada burilish,

Har qadamda qurilish,

Yangilanish, poklanish,

Oldingi safda yurish.

Kerak endi porlamoq,

Kerak endi chaqnamoq.

Chin insoniy burchingni

Lozim toʻla oqlamoq.

Bir joyda qolib ketish,

Depsinish, nolib oʻtish,

Kechirib boʻlmas gunoh,

Ertani yonmay kutish.

Koʻp joylarda gʻavgʻo bor,

Koʻp joylarda dolgʻa bor.

Bizda kitobxon uchun

Eng kattakon sovgʻa bor.

Daryoday oqib oʻqi,

Qalblarni yoqib oʻqi.

Zehnni charxlab turib,

Magʻzini chaqib oʻqi!

Oʻqigan oʻtar endi,

Bilimdon yutar endi,

Zakovat bilan yurtni

Boshingga koʻtar endi.

Xurram Raimov