Bu Vatanning qosh-u ko‘zi,

Mujgoni bor, bolajon.

Urib turgan sof yuragi,

Vijdoni bor, bolajon.

Parvarishlang nihol yanglig‘,

Dilda o‘sgay gul Vatan.

Tosh otsangiz ozor chekar,

“Voh!”, joni bor, bolajon.

Siz – Vatanning orzulari

Osmon qadar yurakchasi.

Siz – Vatanning vujudida

Jigarining bir parchasi.

Yuraklarda yaproq yozgan

Kurtak misol tilagingiz.

Shul diyorning quchog‘ida

Kuchga to‘lsin bilagingiz.

Kiprik bo‘ling jon Vatanni

Qorachiqday asramoqqa.

Siz shay turing Vatan ishqin

Olov, cho‘g‘day asramoqqa.

Qo‘lni bering qo‘lingizga,

Marjon bo‘ling, bolajon.

Ko‘z tegmasin ona yurtni

Giryon bo‘ling, bolajon.

Mirzohid MUSAQULOV,

Samarqand viloyati Qo‘shrobot tumani

42-maktab o‘qituvchisi