“Fil” turkumi

Uy ishini bajarmay

Uxlab qoldi Sobirvoy.

Ona tili darsida

Bo‘ldi rosa “holi voy”.

– Fe’lni tushuntir qani, –

So‘radi undan ustoz.

Fe’l qolib, o‘rmon filin

Maqtashga tushdi shovvoz:

– Karnayday ovozidan

Cho‘chib, hamma qochadi.

Xartumiga suv olib,

Favvoradek sochadi...

Xonani tutdi birdan

Bolalarning kulgusi.

Kim kitob o‘qimasa

Shunday afsus qilgusi.

Rassom

Rassom Anvar yo‘lbarsning

Yo‘l-yo‘lini chizardi.

Ukasi berib savol,

Xayolini buzardi:

– Yo‘l-yo‘lin chizmang, aka,

Xunuk bo‘lib qoladi.

Anvar deydi: – Chizmasam,

Mushuk bo‘lib qoladi.

Ahil qo‘shnilar

Qorda yurib ayiqvoy

Shamollab, bo‘ldi kasal.

Qo‘shnisi mushuk unga,

– Sog‘ bo‘l, – deb tutdi asal...

Yaxshilik unutilmas,

Maymoq buni biladi.

Tuzalgach u mushukni

Qaymoq bilan siyladi.

Bahodir OBID