Yomg‘irga sovg‘a

Yomg‘ir yog‘di kun bo‘yi

Suvga to‘ldi ko‘lmakcham.

Quvonchidan miriqib,

Suzar mitti o‘rdakcham.

Yana erka zaminning

Yuvildi chang-g‘ubori.

Katta bo‘lib qolibdi

Kecha ekkan niholim.

Ahd qildim mitti nihol,

Daraxt bo‘lib ulg‘aysa.

Kuz kelib, meva tutib,

Hosillari ko‘paysa...

Ilk pishgan mevalardan

Savatchamga teraman.

Rahmat aytib chin dildan

Yomg‘irjonga beraman.

O‘roq

Dehqonbobo bug‘doyi

Yetilib pishdi rosa.

Bo‘liq boshoq quyoshdan

Oldi oltin andoza.

Mehnatsevar o‘roqjon

Zerikib uyqusidan,

Ishga tushib ketdi tez

Ishchanlik tuyg‘usidan.

O‘rim tugab xirmonga

Uyib qo‘yildi donlar.

Shirin kulcha ulashib,

Kuzatildi mehmonlar.

Ammo dehqon yodidan

Ko‘tarilgan, bechora.

O‘roq charchab, joyida

Uxlar edi nachora.

Dilorom MO‘MINOVA,

Namangan Davlat universiteti talabasi