Majnuntol

Sen betartib qiz bo‘psan,

Hoy, majnuntol, majnuntol,

Yo‘qmi, axir bog‘iching?

Sochlaringni yig‘ib ol.

O‘zga yurt

Barcha sharoit bor-ku,

Ammo meni aqlim lol.

– Nima uchun bananvoy,

Boshing egik, qadding dol?

– Sharoit yomon emas,

Yo‘q kamchilik demasman.

Lekin, tushun birodar,

O‘z yurtimda emasman.

Ko‘makchi

– Ko‘makchi nima ekan?

So‘radi ustoz kulib.

Sakrab o‘rnidan Aziz,

Javob berdi shoshilib.

– Idishlarni yuvganda,

Uyni supurganda ham.

Ko‘makchi deb singlimni,

Maqtar har kuni onam.

Mehr qo‘shib

Ovqatning ham bo‘ladi,

Achchiq yoki shirini.

Men bilaman haqiqiy,

Shirin ovqat sirini:

Kim agar tayyorlasa

Taomni dildan jo‘shib,

Eng muhimi, ovqatni,

Pishirsa mehr qo‘shib.

Dilnoza Tillaboyeva

bir necha yillardan beri she’rlar mashq qilmoqda. O‘tgan 2016-yili Toshkent shahar Olmazor tumanidagi Sharqshunoslik akademik litseyini tamomladi. Dilnozaning yangi yozgan she’rlarini o‘qib behad quvondik. Chunki u muxlislar qalbiga kirib boradigan she’rlar yozibdi.