Jizzaxlik o‘quvchi – Mashhura Yoqubjonovaning she’rlarini o‘qir ekanman, uning o‘z aytar so‘zi, o‘ziga xos falsafasi borligiga amin bo‘ldim. U sodda, jo‘n holatlardan ham ma’no topib, she’r yoza oladi. “Yig‘ina boshlaydi xo‘rsinib oqshom”, “Ariqlar yosh boladek qiyqirishib oqadi”, kabi  chiroyli o‘xshatishlarini o‘qiganingizda she’riyatdagi badiiy obrazlardan unumli foydalana olishiga ishonch hosil qilasiz. Kelajakda haqiqiy shoira bo‘lish uchun izlanayotgan, o‘z ovoziga ega bo‘lishga intilayotgan Mashhuraga omad tilayman.

Shodi  OTAMUROD,

O‘zbekiston Yozuvchilar

uyushmasi a’zosi

Tong

Ko‘zlarin ohista ochadi gullar,

Iforin sochadi sarrin havoga.

Yuragimni tutib quloq solaman,

Bulbullar kuylagan ajib navoga.

Kokilim o‘ynoqlab to‘ymaydi sira,

Go‘yo shabbodalar ularga maftun.

Ariqlar sharrosi, maysa kulgusi

Tabiat aks etgan ajib bir fusun.

Atirgul bargini bezaydi shudring,

Ariqlar labida qolib ketar shom.

Surati namoyon bo‘lganda tongning,

Yig‘ina boshlaydi xo‘rsinib oqshom...

Yoz

Quyoshbobo samodan

Xursand bo‘lib boqadi.

Ariqlar yosh boladek

Qiyqirishib oqadi.

Turfa meva g‘arq pishgan,

Fayzga to‘la dasturxon.

Tilyorar qovunlar-u,

Qip-qizargan shirmoy non.

Shodon baliqlar kabi

Hovuzlarda cho‘milib,

Salqin bog‘ni kezamiz,

Sevinchlarga ko‘milib.

Qalam va yo‘ng‘ichvoy

Bir kun arz qildi qalam:

–  Menda bordir bir alam.

Tirnab xo‘p o‘tkirlaysan,

Tugab borar umrim ham...

Yo‘ng‘ichvoy dedi hayron:

–  Kechir meni, qalamjon.

Senga yomonligim yo‘q,

Tutar meni bolajon.

O‘tkirlayman, charxlayman,

Chiroyliroq yozgin deb.

Chizgan suratlaring ham

Jilolanib tursin deb.

Qalam bo‘lmabdi xafa,

Chiqaribdi xulosa.

Ikkovi do‘st tutinib,

Mehnat qilishar rosa.

Mashhura Yoqubjonova,

Jizzax viloyati Zomin tumanidagi

50-maktabning 10-sinf o‘quvchisi