Yaqinda chop etilgan “Oymomabog‘ navolari” to‘plami qo‘lingizga yetib borishiga ishonamiz. O‘zbekiston xalq artisti Shermat Yormatov o‘z vaqtida ushbu kitob bilan tanishib, taqrizchi sifatida quyidagi mulohazalarni yozib bergan ekan. Taniqli kompozitorning “Oymomabog‘ navolari” qo‘shiqlar to‘plamiga  bildirgan fikrlari siz jurnalxonlarni bu kitob haqida tasavvur hosil qilishingizga yordam beradi.

“Oymomabog‘ navolari” O‘z­bekistonda xizmat ko‘r­­sat­gan madaniyat xo­di­mi, shoira Umida Ab­du­­azi­mova va kompozitor Ju­ma­dulla Nazarovning hammualliflikdagi ijod mah­sul­i. Avvalo, men bu ikki ijod­korni ushbu to‘plam bilan qutlamoqchiman. Kompozitor va shoira hammuallifligida ya­ra­tilgan qo‘shiqlar jamlangan ki­tob yurtimizda ilk bor nashr qilinmoqda.

Shoiraning she’rlari bolalari­mizga judayam tanish – ohang­dor, yorqin. Kompozitor o‘sha ohanglarni to‘g‘ri ilg‘ab, yo­qimli va jarangdor musiqalarda aks ettira olgan. Kuylari esda qolarli, usullari – o‘ziga xos, gormonik yechimi mukammal ravishda notalarda o‘z aksini topgan. Ushbu to‘plamdan bolalarimiz orasida sevib, kuylanib kelayotgan “Oymoma”, “Umidaning allasi”, “Toy-toy”, “Fil”, “Barnoning qo‘g‘irchog‘i kabi bir qator qo‘shiqlar bilan birga hali siyohi qurib ulgurmagan yangi qo‘shiqlar ham o‘rin olgan.

Qo‘shiqlar mavzusi xilma-xil. “Toy-toy” qo‘shig‘ida xalqimizning chiroyli udu­­mi – farzand­lari­miz­­ning ilk qadam bo­sishi munosabati bilan oilada o‘tkaziladigan “Arqon kesdi” ma­rosimi kuylansa, “Oymoma”, “Kaptarjon”, “Chaq­moq” qo‘shiqlari tabiatga mehr-muhabbatga yo‘g‘rilgan.

To‘plamdan o‘rin olgan “Ulug‘ Vatan” marshi “O‘zbekiston – Vatanim manim” res­publika tanlovining sovrindori bo‘ldi. Mualliflarning “Fil” qo‘shig‘i O‘zbekiston kompozitorlar va bastakorlari uyushmasining bolalar qo‘shiqlari festival tanlovida birinchi o‘ringa loyiq topildi. “Ukajonim”, “Maktabim”, “Yangi yil” qo‘shiqlari ham o‘z tinglovchilarini topdi. Barcha musiqa o‘qituvchilari va musiqa to‘garagi rahbarlarining, qolaversa, turli yoshdagi qo‘shiq ixlosmandlarining e’tiborini jalb etishga arzigulik bu qo‘shiqlar to‘plami musiqamiz olamiga bir yangilik olib kiradi deb ishonaman. Bolalar ansambllari va dastalari o‘z repertuarlarini to‘plamdan o‘rin olgan qo‘shiqlar bilan boyitib borishini tavsiya qilaman. Zero, she’r va ohang uyg‘unligi mujassam bu qo‘shiqlar baland saviyada, professional darajada yozilgan.

O‘ylaymizki, bu ikki ijodkor hammual­liflikda bundan keyin ham qo‘shiqsevar farzandlarimizni o‘zlarining yangidan-yangi asarlari bilan xursand etaveradilar.