Kitobning nomini o‘qib qiziqib qoldingiz-a?! “Sichqonchaning qanday sarguzashtlari bor ekan?” degan savol ham tug‘ildi, to‘g‘rimi? “Sichqoncha sarguzashtlari” – ertak doston bo‘lib, unda tirishqoq sichqonchaning xasta onasining sog‘ayib ketishi yo‘lida amalga oshirgan jonbozliklari hamda boshiga tushgan sinovlarni qanday yenggani qiziqarli tasvirlanadi.

Bolalar shoiri Turob YUSUFning ushbu to‘plamidan Vatan, ona tabiat va beg‘ubor bolalikning o‘ziga xos ajib dunyosi aks etgan turli mavzularda bitilgan she’rlari o‘rin olgan.

Quyida shoirning kitobiga kirgan she’rlardan namunalar o‘qiysiz.

Ona tilimiz

Ajib ona tilimiz –

Bizning jon-u dilimiz.

Uni bilmasak bekor

Bor olgan bilimimiz.

Yuksaklikka ketgan yo‘l

Dilimizdan boshlanar.

Bor bilim, asli, ona

Tilimizdan boshlanar.

Ona tovuqqa

Zarb berib qayta-qayta

Mushukni ham yiqasan.

Burgutga ham bas kelib,

Dadil qarshi chiqasan.

Jo‘jalaring bo‘lmasa,

Bu jasorat bo‘lmasdi.

“Ona tovuq” degan nom

Senga to‘g‘ri kelmasdi.

Bezori bolalar

Bor shunaqa bolalar,

Qush iniga tosh otar.

Ular o‘zi qanaqa? –

Tushunmasdan bosh qotar.

Esing bo‘lsa, bu ishni

Keltirma hech o‘yingga.

Ne qilarding, birovlar

Tosh yog‘dirsa uyingga?

Oftobga savol

Tongdan oltin nurlaring

Har tomonga yoyasan.

Tiriklik tog‘idagi

Juda ulkan qoyasan.

Nur-yog‘dung tig‘day o‘tkir,

Tikilsak, ko‘z yoshlanar.

Har yangi kun nechun sen

Uxlaganda boshlanar?

Uyg‘oq bulutlar

Yasab kema o‘xshovin,

Suzib yurar bulutlar.

Ayg‘ir otday tushovin

Uzib yurar bulutlar.

Qo‘zg‘alar tog‘-qirliklar,

Shiddatdan to‘xtamaydi.

Uxlab yotar yerliklar,

Bulutlar uxlamaydi.

Quvvat manbai

Kitob – oqim, duch kelib,

Aqlimizni shoshirgay.

Ong – ariqqa kuch berib,

Qirg‘og‘idan toshirgay.

Shu jihatdan olganda,

Qurshalgan har tomonim.

Daryo, ko‘l, okeanga

To‘la kitob javonim.