Katta tanaffusda biz –

Zubayda, Yashin, Ramz,

Sarvar, Dilbar, Ma’suda

Bahslashdik bir mavzuda.

Mavzu edi ko‘p bahsli

“Kimga qayerda yaxshi?”

Uyga topshiriq edi,

Topshiriq qiziq edi...

–  Baliqlar yayrar suvda! –

Boshlab berdi Ma’suda.

–  Qushlarga samo yaxshi... –

Qo‘shimcha qildi Yashin.

–  Odamga-chi? – der Shahnoz,

Yerda-da! – dedi Avaz.

–  Yerda, suvda, ko‘kda ham

Yashay oladi odam! –

Dadil so‘zladi Sarvar,

Bejizga emas sardor!..

–  Yer asli ummonli shar,

Qo‘shimcha qildi Dilbar.

–  Uchyapmizmi samoda? –

Hazil qildi Samandar.

–  Tushunmasang, gap qo‘shma! –

Xo‘mrayib qo‘ydi Chashma.

... Qo‘ng‘iroq yangrar shu choq...

Ustoz kirdi. Tur, o‘rtoq!

Muallim so‘rab bildi,

Bizlarga nazar soldi...

–  Afsus, moviy osmonda –

O‘sha cheksiz tomonda –

Paydo Azon teshigi...

Kengaymoqda eshigi.

Quyoshning o‘tkir nuri

Qizirkan, ko‘llar qurib,

Muzlar erir qutbda...

Bu holni kim kutibdi?

Ekologiya – notinch,

Odam sarflar katta kuch,

Tabiatga daf qildi –

Oxiri nima bo‘ldi?

Teshikni yamab bo‘lmas,

Odamzotga og‘ir dars...

Zamin chekar nolalar,

Shuning uchun, bolalar,

Asraylik tabiatni

Eng ulug‘ bu ne’matni.

Kelajakda ham hatto

Qaytarilmasin xato!

Sobir JABBOR