Qariyapman,

Ko‘zim asta tinib borar.

Bilagimdan quvvat ketib,

So‘nib borar.

Tushib ketdi bir-bir oziq

Tishlarim ham.

Bu kechasi tushlarimga

Kirdi onam.

–  Bolam, – dedi, – ahvolingdan

Xabar topdim.

Xazonlarni ko‘rpa qilib

Senga yopdim.

Yoshligingda o‘rmonlarning

Zo‘ri eding.

Necha-necha qo‘zichoqning

Boshin yeding.

Vaqting keldi, sovib borar

Endi tanang.

Xudo qabul qilarmikan

Tavbangni ham?

Bir istagim, dunyo qayta

Yaralgan dam,

Bu olamga maysa bo‘lib

Kelgin, bolam!

Sharifa SALIMOVA,

O‘zbekiston Respublikasida

xizmat ko‘rsatgan madaniyat xodimi