Vatan himoyachilariga bagʻishlanadi

Vatan asli ostonadan

Boshlanadi, deydilar.

Vatan nima?

U bir qoʻrgʻon –

Boshpanadir, deydilar.

Uning har bir xizmatiga

Shay turmoqlik – burchimiz.

Himoyaga berilgandir

Bilakdagi kuchimiz.

Siz dunyoga nazar tashlang

Nigohlari savollar.

Bunda qancha gʻalayonlar,

Qancha umri zavollar!

Odamlar bor hali bir bor –

Tinchlik taʼmin totmagan.

Goʻdagini erkalatib,

Osoyishta yotmagan.

Ming shukrki, bizlar ozod,

Turmushimiz farovon.

Musaffodir osmonimiz,

Quyoshimiz charogʻon.

Shu vatanning tinchligini,

Hurligini saqlaylik.

Mehr fazilatlar ichra –

Durligini saqlaylik!

Orif Toʻxtash