Vatan timsoli

Oʻzbekiston timsoli,

Aks etgan yurt iqboli.

Boshda Xumo qushi bor,

Topgan obroʻ-eʼtibor.

Quyoshday pok Vatanim,

Erk yaratgan makonim.

Xalqim tanlagan nusxa,

Yaqinsan dilga, koʻzga.

Mamlakatim naqshisan,

Sharqning orombahshisan.

Vatan ramzi – koʻrkamsan,

Yosh umrimga ilhomsan.

Masxaraboz

Hayvonot bogʻidagi

Maymun sakrab oʻynaydi.

Birovlarni kalaka

Qilishni hech qoʻymaydi.

Kulgi boʻlar hammaga

Qilmishiga yarasha.

Oʻzgani mazax qilib,

Oʻzi boʻlar tomosha.

Kenguruning bolasi

Koʻrsang gʻashing keltiradi

Kenguruning bolasi.

Haddan ziyod erkalatib

Yuboribdi onasi.

Chatoq boʻlar chiniqtirib

Oʻstirmasa otasi.

Mehnat qilmay, pinjga kirib

Yashash katta xatosi.

Oʻtkazsa u bolaligin

Parvo qilmay xaltada,

Ayting nima kutib boʻlar

Bunday fahmi kaltadan?!

Birovning dardi

Nortuyaning oyogʻiga

Ketganida mix kirib:

– Voy-voy, ogʻriq azob berar, –

Dedi shoʻrlik boʻkirib.

– Nafasingni oʻchir, daroz,

Bir mixgami shuncha dod.

Mening har bir nagʻalimda

Toʻrttadan mix bor, – der Ot.

Laylakjon

Yovuzlikdan bez, mayli,

Bizdan ammo bezmagin.

Yakka-yu yolgʻiz kelib,

Yuraklarni ezmagin.

Yurtimizni, laylakjon,

Yashnab, yayrab tut makon.

Erkni sevgan qushlarga

Bizlar doim mehribon.

Qambar Ota