Oyim deydi: – Qo‘y, bolam,

Pichoq qo‘lni kesadi.

Dadam deydi: – Qo‘y, o‘g‘lim,

Bolg‘a panjang ezadi.

Bobom der: – Ketmonni qo‘y,

Oyog‘ingni chopadi.

Momom derlar: – O‘ynama,

Iting o‘jar, qopadi.

Opam, gulni ushlama der,

Tikani qo‘lga kirar.

– Kompyuterga tegma, – deb

Akamlar dashnom berar.

Buyruq va dashnomlardan,

Jovdiraydi ko‘zlarim.

Sizlar xolis aytinglar,

Nima qilay, do‘stlarim?

TANDIR

Ichimga o‘t yoqishar,

Turli holga tushaman.

Avvaliga qorayib,

So‘ng oqarib, pishaman.

Ishim og‘ir va lekin,

Chidamasam bo‘lmaydi.

Mensiz to‘yda dasturxon

Shirmoy nonga to‘lmaydi.

Qo‘zi ISMOIL