Shoshqaloq

Shoshib keldi-yu, Xoliq,

Piyolaga choy suzdi.

Ichgandi, kuydi og‘zi,

Dodi olamni buzdi.

Shoshqaloqning holi shu,

Bilmas hayot hazilin.

O‘ziga ham sezdirmay,

Berib qo‘yar ta’zirin.

Besh ketdim

Tizilishib

Turnalar,

Uchar ko‘kda

“Qur-qur”lab.

Shaddod Vali

Lol qotgan,

Gap qotadi

Pichirlab:

– Kim o‘zarga

O‘ynamay

Saf tortishgan,

Uchar jim.

Qanday ahil,

Do‘st-inoq,

Turnalarga

Besh ketdim.

Shamol qoʻshigʻi

Uchiraman varrakni,

Aylantirgum parrakni.

Suv yuzin jimirlatgum,

Toshni ham qimirlatgum.

Qumloqda paydo izim,

Qor uzra rasm chizgum.

Shabnamni simiraman,

Xazonni supuraman.

To‘siq nima, bilmayman,

Nazarimga ilmayman.

Qo‘lbog‘ichga yo‘q hojat,

So‘ramayman hech najot.

Chunki hurman, erkinman,

(Kavakka-da berkinmam).

Tutmang sira qo‘limdan,

Adashmayman yo‘limdan.

Temurbek bolalari

Saf tortamiz

Ertalab,

Yel esganda

Erkalab.

Mag‘rur qadam

Tashlaymiz,

So‘ngra qo‘shiq

Boshlaymiz.

Gurs-gurs qadam

Tovushi,

O‘ngarar oy

Kovushin.

Osmon yechib

To‘nini,

Qutlar yangi

Kunini.

Yurtga tegar

Nafimiz,

Yurtga qalqon

Safimiz.

Oʻroz Haydar