Onam deganimda oqsoch, jafokash,

Munis va mehribon chehrang namoyon.

Sen axir bag‘ringda parvarish qilib,

Ko‘zimga baxsh etding ko‘zgudek jahon.

G‘afur G‘ULOM

Mushtipar ham o‘zing, buyuk ham o‘zing,

Kuyinchak ham o‘zing, kuyuk ham o‘zing.

Olamga tatirlik suyuk ham o‘zing,

Payt keldi aytmoqqa, gapning xonasi,

Ey, O‘zbek onasi, O‘zbek onasi.

Abdulla ORIPOV

Ko‘ngil gul bog‘ida asrayman sizni,

Ko‘zim qarog‘ida asrayman sizni,

Qalbim ardog‘ida asrayman sizni,

Bog‘bonim, posbonim, aziz onajon!

Normurod NARZULLAYEV

Bu dunyoning xilqati ayol,

Ma’no birla hikmati ayol,

Odamzodga tilagi – iqbol,

Ko‘rmay desang umringda zavol,

Sen onalar duosini ol.

Oxunjon HAKIMOV

Ayol nomi qoshida dunyo

Ehtirom-la etgaydir ta’zim.

U hayotning ramzidir go‘yo,

U hayotday mangu va azim.

Jumaniyoz JABBOROV

O, ona hech biri emasdir shirin

“Bolam!” deb bir og‘iz aytgan so‘zingdan!

O, ona mehringda quyosh yashirin,

Ne ajab, gul unsa har bir izingda!

SHUHRAT

Ona hayot osmonida

Yorqin quyosh bo‘lib charaqlar.

Farzand uchun kerak bo‘lsa u,

Hatto cho‘g‘ni kaftida saqlar.

Sa’dulla HAKIM

Millatning egasi, millatning nasli,

Siz atir nafasli, siz rayhon sasli,

Ketmas bo‘lib kelgan bahorsiz asli,

Men oftobga alishmagan ayollar

Mahmud TOYIR

Bor yulduzlar sizga xizmat qilsalar,

Ummonlar ham siz deb qurib, to‘lsalar.

Gullar sizdan rang-u ifor olsalar,

Chaman bo‘lsa yurgan ko‘cha-ko‘yingiz,

To‘larmidi hech to‘lmagan ko‘nglingiz?

Sirojiddin SAYYID

Hovlimizda jannat bo‘yin taratgan,

Sabolarga ifor tutgan, yayratgan,

Ko‘kdan oy-u oftobni ham qaratgan,

Borlig‘ida malaklarmi nihonlar,

Rizvon ekan onam ekkan rayhonlar.

Minhojiddin MIRZO