Hazilga hazil

Ukajoniga

Akasi Asil:

– Muzqaymoq yeysanmi?! – deb,

Qilgandi hazil.

Hazilga hazil

Qaytardi u ham:

– Xafa boʻlasiz,

Yoʻtalib bersam.

Charchadi

– Yomgʻir ham tinibdi, – der

Oʻgʻliga Yahyo togʻa.

– Nega endi tinmasin,

Charchadi yogʻa-yogʻa.

Buloq

Turna koʻzli buloqcha

Qaynab yotar biqirlab.

Qaynar-u, toshib ketmas,

Kulgan boʻlar qiqirlab.

Kurash

Mard lochinga hujum qildi,

Bir toʻp quzgʻun – bosqinchi.

Yakka lochin olishardi,

Ketmasin deb, togʻ tinchi.

Dedilarki: “Ular koʻpdir,

Chekin yoki boʻl taslim!”.

Sado keldi: – Taslim boʻlish

Mening uchun bu – oʻlim!

Or qilaman kesak kabi

Sekin-asta nurashdan.

Men lochinman, yengilsam ham

Kurash boʻlsin kurashday.

Dil soʻzlari

Oq kaptarim chiroyli,

Koʻk kaptarim chiroyli.

Tinchlik qushi deydigan

Dil gaplarim chiroyli.

Koʻk toqida charx ursa,

Bir dasta gulga oʻxshar.

Quyosh boshida kulsa,

Bir hovuch nurga oʻxshar.

Parvoz aylang elma-el,

Qanotingiz tolmasin.

Yer yuzida “Tinchlik” deng,

Eshitmagan qolmasin.

Afrikalik yoʻlbars

Yoʻlbars yurar qafasda,

Koʻrdik dadam,

Men, Gʻani.

Hazil qildilar dadam:

– Ishlar qalay, ogʻayni?

Yoʻlbars parvo qilmaydi,

Ukam sekin jilmaydi:

– Afrikadan kelgan u,

Tilimizni bilmaydi.

Habib Rahmat