Aziz oʻquvchilar! Oʻzbekiston Yozuvchilar uyushmasi aʼzosi Nabijon ERMATOV qiziqarli topishmoq va tez aytishlari orqali siz oʻquvchilarga yaxshi tanish. Ijodkorning yaqinda “Muharrir” nashriyotida chop etilgan qanotli doʻstlarimiz – qushlarning turli xususiyatlari haqidagi kitobi ham sizga manzur boʻladi, deb oʻylaymiz.

Qushlar olami

Qush nomlarin sharhladim,

Bolajonlar sizlarga.

Shoshilmay oʻqib bering,

Yaqin oʻrtoq, doʻstlarga.

Alifbo tartibini

Qushlar bilan boyitdim.

Ancha qiyin kechsa ham,

Taʼriflarin jo etdim.

Oʻqib, uqing birma-bir,

Qushlar haqda sheʼrimni.

Bilasiz feʼl-tusi-yu,

Ular oʻsgan yerini.

Qush turlari sharhiga

Mulohaza avjlansin.

Bilagʻon bolajonning

Fikrlari mavjlansin.

Tovus

Tovuqsimon bir qush u,

Qirgʻovullar urugʻi.

Oyogʻi xunuk, lekin

Goʻzal, uzun quyrugʻi.

Kamalakdek tovlanar

Dumin yoysa, bu soz-u

Shu husniga yarasha

Hush boʻlsaydi ovozi.

Saʼva

Sayroqi qush turkumin

Qatorida oʻrnim bor.

Chiroyim koʻzga yaqin,

Diltortar, xush koʻrkim bor.

Vaznim juda ham yengil,

Tumshuq chidamli, toʻmtoq.

Oʻrmon, toʻqay, bogʻ-togʻda,

Kezib yuraman koʻproq.

Bir yilda ikki marta,

Jish joʻjalar ochaman.

Ikki hafta oʻtganda,

Uchsa mehrim sochaman.

Hasharotlar, don-dunlar

Yeb yuramiz asli biz.

Boqilsak xonadonda,

Sayrash bizning kasbimiz.

Tuyaqush

Oyoqlarimiz kuchli,

Ucholmaymiz chopamiz.

Nim chuqur uya yasab,

Toʻqqiz tuxum bosamiz.

Asli afrikalikmiz

Keng joylarga oʻrgangan.

Endi uyda saqlashar,

Eh, erkimiz cheklangan.

Tadbirkorlar boqishar,

Koʻnikkanmiz “tuzoq”qa.

Goʻsht-u, tuxumimizni

Yegan mazza qilmoqda.