Umida ABDUAZIMOVA

Bizga o‘xshar

Yozda qaray olmasdim,

Quyoshga.

Tik qarasam to‘lardi

Ko‘z yoshga.

Qishda boshqacha bo‘lib

Qolibdi,

Bulutlarga o‘ralib

Olibdi.

Issiq kiyimlar kiyib

Yuribman.

Quyoshga tik qarab

Turibman.

Yoqimli xayollarga

Berildim.

Quyosh bizga o‘xsharkan,

Deb bildim.

Chaqmoq

Chaqmoq chaqdi,

Chaqmoq chaqdi.

O‘t-o‘lanlar

Marjon taqdi.

Soching o‘sar yomg‘irda.

Qoning jo‘shar yomg‘irda.

Yalang oyoq yur, qani!

Dalaga yugur, qani!

O‘t-o‘lanlar marjoni,

Qo‘ng‘iroqgullar joni.

Yomg‘irni chorlab kelar,

Qilichi porlab kelar.

Chaqmoq chalg‘itmoq bo‘lar.

Balki uyg‘otmoq bo‘lar,

Qo‘rqoqlarni qo‘rquvdan,

Uxloqlarni uyqudan?..