Azamat XUDOYBERGANOV

Sabzi qo‘shig‘i

Quyon meni aftidan

Ko‘proq yeb qo‘ygan chog‘i.

Bo‘yi o‘sish o‘rniga,

O‘sib ketdi qulog‘i.

Ustozlarga maslahat

Yurmangiz afsus, deya,

“Quloqsiz” bolalarga

Meni qiling tavsiya.

Laylak

Shanba kuni ertalab

Bozorga tushdi Laylak.

Sotib oldi o‘ziga

Bejirim qizil ko‘ylak.

Lekin shimga kelganda

Omadi hech chopmadi.

O‘ziga mos birorta

Loyig‘ini topmadi.

Sarimsoq

Do‘stlarimdan hech biri

Mos kelmaydi didimga.

Chunki qochar barisi

Chidolmasdan hidimga.

Nima qilsam ekan, deb

Juda ko‘p o‘yga toldim.

So‘ng bozordan eng xushbo‘y

Zo‘r atir sotib oldim.

Endi chiqmas noxush hid,

Chin haqiqat so‘zlarim.

Keling, endi boshqatdan

Do‘stlashamiz, do‘stlarim.