Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Sport jon-u dilimiz

Yosh sportchilar qo‘shig‘i

 

Elda bor shunday naql:

“Sog‘ tanda – sog‘lom aql”.

Qilib badantarbiya

O‘samiz ziyrak, oqil.

 

Alpomishga vorismiz,

Haqparvar-u xolismiz.

Temuriy bahodirlar,

Tanballikdan olismiz.

 

Chiniqqanmiz, chaqqonmiz,

Qalbi olov – vulqonmiz.

Kerak bo‘lsa, Vatanga

Madadkormiz – qalqonmiz.

 

Sport jon-u dilimiz,

Sharaflaydi elimiz.

Chempionlik orzusi

Yoritadi yo‘limiz.

 

 

Ko‘pkari

 

Asl, halol olishuvdir

Ko‘pkari.

Ko‘pkariga chidolmaydi

Ko‘plari.

Xalq o‘yini, chavandozlar

Sinovi.

Polvonlarga el hurmati,

Siylovi.

Ushlaganin uzib olar

Chavandoz.

Bo‘sh kelmagin, dadil tashlan

Ha, shovvoz.

Mard yigitlar raqibini

Hurmatlar.

Tantilik-la ko‘rsatadi

Himmatlar.

To‘y boshladik, ovozasi

Taralar.

Ko‘pkariga keling do‘stlar,

Jo‘ralar.

 

 

Orzu yo‘li

 

Tunel qazdik tog‘ o‘pirib,

Uddaladik chin gapirib.

Buni tarix ko‘rgan qachon?!

Fikr qiling, bir o‘tirib.

 

Mahv etildi ulkan dovon,

Ipak yo‘li bo‘ldi ravon.

Bo‘ylashay, der osmonlarga,

Yo‘lga chiqdi buyuk karvon.

 

Ikki kokil – temir izlar,

Quvonadi ko‘rib ko‘zlar.

Yaqin bo‘ldi uzog‘imiz,

Egasimiz siz-u bizlar.

 

Temir tulpor go‘yo uchoq,

Borar shitob bilmay charchoq.

Qarshi olar dovon osha

Oltin vodiy ochib quchoq.

 

Orzu yo‘li – Angren – Pop,

Yuz ko‘rsatar yangi bir bob.

Temir yo‘lmas – mo‘jiza bu,

Kelajakka da’vat, xitob.

 

Ko‘ksimizni qilib qalqon,

Tog‘-toshlarni etib qalqon.

Yo‘l yotqizdik Farhod bo‘lib,

Ochildi zo‘r yangi imkon.

 

Yangi imkon – ulkan orzu,

Maqsadimiz tugal ezgu.

Yetsak deymiz Chin mochinga

Dilimizda so‘nmas tuyg‘u.

 

Ko‘prik bo‘lar xalqlar aro,

Mohiyati zo‘r xalqaro.

Qoyil butun jumla jahon,

Faxrlanar har fuqaro.

 

Ravshan ISOQOV

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.