Uzoqlarga borma, qo‘y,

Kezaverma ko‘p shahar.

Atrofingga bir qara,

Tog‘da yashaydi bahor!

Qishin-yozin yashil to‘n

Archalarda yashar u.

Bunda chaman bog‘larning

Gullarida yashnar u.

Bu – na’matak, tanib qo‘y,

She’r bo‘lar gullagani.

Borliq kuylar, tabiat

Jim bo‘lar tinglagani.

Asriy chinor yaprog‘i

Xushnud chalar chirmanda.

Lolalari raqqosa,

O‘yin tushar chamanda.

Shamsiya tutib boshga

Oqargan qo‘ziqorin.

Osmon bobo yomg‘irdan

Sozlaydi kuyli torin.

Uzoqlarga borma, qo‘y

Kezaverma ko‘p shahar.

Bizning tog‘larda bilsang,

Yil bo‘yi yashar bahor!

Hamidulla MURODOV