Yangi gaplar sotaman,

Eski gaplar ham.

Bolajonlar, kepqoling,

Qoldi juda kam.

Surishtirmang narxini

Shardan ham arzon.

Xo‘rozqandga – rost xabar,

Pishloqqa – yolg‘on.

Almashaman yangisin

Kepaksiz unga.

Eski gapni – puch yong‘oq

Yoki sovunga...

Buni tongda eshitdim,

Eng yangi xabar:

Yeb qo‘yganmish tushida

Burgutni kaptar.

Quyon yo‘lbars terisin

Yopinib yurib,

Hushdan ketdi, ko‘zguda –

O‘z aksini ko‘rib.

O‘tgan kuni Tulkivoy

Obkelib Xo‘roz,

Hiringladi Bo‘riga

Taltayib biroz.

Bo‘ri esa xush ko‘rmas

Hazil, kulgini.

Avval yedi Xo‘rozni,

So‘ngra Tulkini.

“Savodsiz”, deb Ayiqni

Qilganmish ermak –

Uch yil bitta sinfda

O‘qigan Eshak.

Kecha doktor Arslonga

Arz qildi Tuya,

Qimmatbaho terimga

Tushdi, deb kuya.

Doktor uning arziga

Soldi-yu quloq,

Shilib olib terini,

Tekshirdi uzoq.

Bugun tog‘da uchratdim

Ochko‘z To‘ng‘izni,

Yamlaganmish u birdan

Besh ming Qo‘ng‘izni.

Kirpi borib bozorga,

Olganmish igna...

Qiziqsangiz, yangi gap –

Topilar yana.

Bolajonlar, kepqoling,

Xilma-xil xabar!

Uni sotib olganlar

Ko‘rmaydi zarar.

Anvar OBIDJON