Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

"Yoz oqshomi salqin va tiniq"

Afanasiy FET

 

***

Ohista qizarar shom,

Tilla tog‘lar, begumon

Havo soviydi, sen ham

Uxla, uxla, bolajon.

 

Bulbullar kuylamas, jim,

Oqshom tushar xush, shodon.

Kuylar oqadi sim-sim,

Uxla, uxla, bolajon.

 

Farishta ko‘zli yulduz

Jimirlar g‘ujg‘on-g‘ujg‘on.

Tun yengil, go‘zal bu kez,

Uxla, uxla, bolajon.

 

***

Ko‘kdan yoyilar mayin

Qorong‘u tun, qorong‘u.

Keng dalalarda tayin

Miltillar soya, yog‘du.

Yuragi toshsa hamki

Tortinib turadi tong,

Sovuq, tiniq xush damki!

Ko‘rinmas quyosh, shu on

Pitirlar qush qanoti...

Subhidam halovati...

 

***

Yoz oqshomi salqin va tiniq,

Tollar mudrar nurga o‘ralib.

Osmon g‘arbi oqish, ol, yoniq,

Yarqiraydi daryo buralib.

 

Sirg‘aladi cho‘qqidan shamol,

O‘rmalaydi o‘rmonda betinch.

Vodiy bo‘ylab kishnaydi xushhol

Uyur-uyur otlar olis, tinch.

 

Rus tilidan Oygul SUYUNDIQOVA tarjimasi

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.